برنامج اسرار المغربية الالكتروني الاداعي للنصائح يالله الحادكات استفدو من الحلقة الاولى

السلام عليكم الحاكات كيفكم

نتمنى تكونو على خير

هدا برنامج اسرار المغربية

برنامج نصائج الكتروني

وهو اول برنامج الكتروني مغربي

الفكرة جات لانو العديد من السيدات كيطرحو عليا اسئلة متنوعة و ربي علي شهيد كنحاول ما امكن مانقصؤش ولكن نفس الاسئلة غالبا ماتكرر لهدا قررنا نعملو هاد البرنامج الالكتروني
واللي غادي يكون فقرتو متنوعة
فالطبخ والجمال والصحة والاسرة
واللي غادي بادن الله نتمنى تستافدو منو حتى هو وتحملو الحلقات فجهازكم بالتالي يبقا عندكم فوقاش مابغيتو تسمعو لو يكون عندكم
الحلقة الاولى من تقديم مدام التازي
تطرقات فالطبخ
ل
دجاجة محمرة بلاما لازيت
مايونيز
وسلطة راقية
فالجمال بروكرام عناية بالجسم من الالف لليا
فالاسرة
منهجية التميز الاسري
فالصحة تكلمت تاني على ديدان الامعاء لانو كتير كيسول عليها بالرغم من انو الموضوع وضعتو هنا فمنتدى لالامولاتي
وفقرة النصائح خديت نمودج واحد السيدة مدبرة اللي عطات افكار قيمة

هنا البرنامج الى بغيتو تسمعو للحلقة الاولى
http://www.4shared.com/audio/YsgashOQ/Asrar-maghribiya.html
ضغطو على الكتلت وبداو الاستماع
الحلقة من تقديم مدام التازي

وممكن تحميل الحلقة على جهازكم من الميديافاير على الرابط
http://www.mediafire.com/?4gbakqhiww554a6
ولاي طلبات مستقبلية مرحبا راسلوني على الخاص او هنا فالشات الى كنت موجودة مرحبا

الحلقة معمول لها نسخة بالامازيغية تقديم اسومة وسيمان
هدا رابط الحلقة بالامازيغية تتضم نفس الفقرات فقط مترجمة للشلحة
http://www.4shared.com/audio/w-aFwuT7/asrar.html
ولتحميل الحلقة بالامازيغية من هاد الرابط

http://www.mediafire.com/?abe95zvbn42ya9r

نتمنى هاد الفكرة تروقكم وتكون فمستوى الاصدارين الاول والتاني اللي كانو عبارة على كتيبات

ونتمناو الاستمرارية لهاد الفكرة بادن الله

هنا وصفات برنامج اسرار المغربية مكتوبة

ففقرة اسرار الطبخ قدمنا لكم دجاجة معمولة بشكل مختلف مع سلطة راقية ومايونيز يتعمل فالبيت


دجاجة ديالنا غادي تطيب فالكوكوت بلاما بلا زيت وهاد الوصفة قدماتها لناالاخت faroha

اولا غادي نحتاجو للمقادير التالية

موطارد
كامون
ضامة البنة دجاج محكوكة
ملح
بزار
تحميرة
الخرقوم

خلطي الخليط ودهني بيه دجاجة مزيان من جميع النواحي باش تشرب العطور
وخليها شوية تشرب الخلطة بينما توجدي الروز باش نعمروها

غادي نحتاجو لارز مصلوق في ماء وملح
نصفيوه ونظيفو لو الكبدة مقطعة رقيقة هي والقلب
و الحامض المصير مقطع رقيق
بزار
ملح
قسبر ومعدنوس
قليل من الزيت
شوية اسكنجبير
خرقوم بلدي
زعفران

نعمرو الدجاجة بالروز ونعقدوليها رجليها ونحطوها في كوكوط ما فيها والو
نسدو عليها ونديروها على نار مهييييلة لمدة ساعة تقريبا ونحلو عليها ونجبدو الدجاجة ندهنوها بالزبدة او السمن
وتدخل للفرن تتحمر

وفي التقديم كل واحد وشنو لي عندو موجود

ممكن ترافقوها مع خضر مغورة
او السلطات

وبالنسبة للسلطات غادي نقتارح لكم سلطة مميزة فالتقديم ديالها وتنفع للضياف هي بسيطة جدا فالعمل لكن راقية فالتقديم كتجي فحال شكل طرطة رولي لهدا كنسميوها سلطة رولي وغادي نقدم لكم معاها مايونيز مضمون مائة بالمائة


خدي البطاطس وصلقيها مزيان ومن بعد عجنيها مع شوية مليحة غي شوية لاننا غادي نستعملو المايونيز مالح
سرحي البطاطا فوق بلاستيكة بيضا وكل مرة كتدهن يديك بالما حتى تسرحيها مزيان بدون استعمال الدلاك غي الما الى بللتي بيه يديك يقضي الغرض


حضري الحشوة واللي فيها كاشير روز مصلوق ماييس جلبانة جزر مصلوق وطون وعمليها فوق عجين البطاطا فالوسط اي بمعنى الحشوة تجي فالوسط
كتلفي البطاطا بحيت يكون الجزء الملفوف يغطي الحشوة تم نلفو من الجهة المقابلة ونحاولو نتبتو مزيان البطاطا بحيت مايبقاش يبان لنا الحشوة
اللف يكون مع الاحتفاظ بالبلاستيكة لانها كتسهل مزيان التحكم فالعجين و هي افضل من ورق الالمنيوم انا جربتهم بزوج وجربت كدلك الفيلم الغدائي الافضل بلاستيكة بيضا نقطعوها ونسرحوها وهي تكون ساحة العمل
من بعد ما انتهينا من اللف وجمعنا الجوانب مزيان نزولوالبلاستيكة
البلاستيكة كتزول بسهولة لاننا كنا كندهنو يدينا بالما وبالتالي العجين ماغاديش يلصق لنا
نغطيو الكل بالماييونيز ممكن تشريه ممكن تعملي المايونيز اللي غادي نتقدم لكم

وفالجوانب نعملو الكاشير محكوك طوليا او فرومج او اللي حبينا

زيني بقشور مطيشة على شكل وردة وخيار فالجوانب وكيبقى كل واحد ودوقو وواش متواجد عندو

بالصحة والراحة
الوصفة سهلة جدا وراقية وهي السلطة المفضلة عندي منين كيجيوني الضياف
ومافيهاش الجهد ومافيهاش الوقت واقتصادية

اما بالنسبة للمايونيز

ممتاز جدا وافضل من مايونيز الزنقة بكتير

والافضل فيه انو كتعرفي اشنو عاملة فيه
واقتصادي وسهل كيوجد فالحين
وماكيحتاجش خبرة
فقط تبعوا معايا
المقادير فيها
بيضة
فروماجة
بطاطا مصلوقة متوسطة القياس اللي كيبان لكم وحاولو مع هاد المقادير يكون هاد القياس لانها الى كانت كبيرة ماكايجيش مداق المايونيز زوين وكيجي فيه البنة ديا بطاطا
الزيت قياس ربع كاس العنبة تقريبا
الخل تقريبا 3معالق كبار
القليل من الملح
نخدمو كلشي فمولينيكس واكيد غادي يكون عاقد
غادي ضيفو لو الما وماتكتروش ضيفو غي شوية باش ترخفوه واحتافضو بيه كيبقا مدة اسبوع تقريبا وكيخرج كمية معقولة والاهم بنتو ممتازة

فقرة اسرار جمال المغربية
اسرار جمال المغربية غادي يوريك كيفاش تعتاني بجمالك طبيعيا من خلال وصفات انتي اللي غادي تحضريها
ونواعدوك انو من خلال متابعتك لحلقات البرنامج غادي تكتسبي خبرة وبالتالي غادي تولي عندك سهولة فاختيار الوصفات المناسبة لبشرتك او نوعية شعرك

فحلقة اليوم غادي نعطيكم برنامج العناية بالجسم والشعر والرجيلات اللي عطاتو لنا جنات بالتفصيل الممل

كتقول جنات انو الصباح فاش فاقت درت حمام زيت لشعرها مكون من زيت بلدية و اعشاب مدقوقة: ازير,خزامى,زعتر تتخليهم مع بعد اسبوع عاد تتبدا تستعملهم.
للاشارة الحمام الزيتي كتعملي الخليط ديال الزيوت وكتعملي فوطة مبللة فوق الشعر باش يمتص هاد الزيوت
هو فعال خاصة للشعر الجاف والمتضرر ولابد تعمليه على الاقل مرة ف15 يوم

و خدات الفازلين و الطالك و عملاتهم لرجيلات و غطاتهم ببلاستيك و دارت ليبة او تقاشر
هاد الوصفة كتعطي نعومة للرجيلات وكترطبهم ومع المداومة كتزول التشقق

في العادي الصابون البلدي كيف كتقول جنات كتعمل معاه ازير مهرمش و الخزامى و الخرقوم البلدي مدقوق و تتستعملو للحمام لكن هاد المرة زادت عليه الحناء و عصير الحامض و شوية الزيت البلدية و خلاتها تندامج مع بعضها و تطلق الحناء
وهادو كلها اعشاب كانو الجدات كيعملوهم فوصفاتهم وفحمامهم لابد نرجعو لهم لانو بالاضافة للبياض اللي كتعطي الوصفة كينة ريحة مميزة


و جربات وصفة الغالية ام سعد لتبييض الابط
هاد الوصفة كتقول ام سعد كانت جرباتها ماماها هي الاولى ومني شافت النتيجة تصدمات ما صدقتش ولى المكان ابيض
وقالتها لبنتها اللي هي ام سعد وجربتها وكانت النتيجة رائعة للابطين والمنطقة الحساسة وام سعد بدورها عطاتها لنا الله يجازيها بيخير عليها
الوصفة هي الحامض والتحميرة
شدي 2ملاعق تحميرة وزيدي عليهم عصير الحامض اللي يجمع ليك الخلطة وديريها وسيري للحمام ومني غتحكي عادي غيزول الكحولية مع الوسخ
غتستعملي الوصفة كل ما بغيتي تمشي للحمام وحتى فحمام الدارالنتيجة رائعة

دخلات لالا جنات للدوش و بدات بغسل شعرها و حكات رجليها باش تسخن مزيان من بعد دارت مساج للبشرة بخليط الحناء ال وجدات و بقات تحرك يديها في كل اتجاه مدة 15 دقيقة غسلات و دارت الصابون
دارت تقشير للوجه من كلين اند كلير
فالحلقات المقبلة غادي نعطيو وصفات مقشرات طبيعية وفائدة التقشير
و من بعد عملات حمام بخار بالماء و الخزامى
و دارت ماسك الطين الاخضر مع ماء الورد و الكليسيرين
حتى نشف عاد مسحاتو بماء الورد و من ثمة رشات وجهها بماء الورد
في نفس الوقت تهلات في رجيلاتها و يديداتها بحيت عملات وصفة مدام التازي واللي فيها السنيدة الكليسيرين و عصير الحامض و خدمات بهم كوماج
من بعد غسلات و مشات لاصال فاش رجعات دارت خلطة الكليسيرين و الحامض لجسمها عاد دوشات

دهنت جسمي ب خليط زيت اركان و المسك

درات لشعرها بديل الزيت ديال بانتين
و مرطب لوجها من اولاي
ماكياج خفيف لكن ركزات على عينيها
وتبارك الله على بروكرام لالة جنات المتكامل من الراس لاخمس القدمين


الاسرة

من خلال برنامجكم اسرار المغربية واللي كيواعدكم انو يقدم لكم الجديد والمميز فكل المجالات
وكيواعدكم يلبي كل طلباتكم ويتقبل انتقاداتكم اللي غادي تساعدو على الاستمرارية والبحث على الافضل
واسرار الاسرة المغربية غادي يقدم لكم منهجية التميز الاسري
هاد المنهجية غادي تكون عبارة على استراتيجية غادي تمكنك من التعامل مع الاسرة ديالك بطريقة ممنهجة مدروسة علمية وعملية
كل حلقة غادي نحاولو نقدمو لكم من خلال فقرة اسرار الاسرة المغربية منهجية معينة اللي غادي تساعدك على تسييير الاسرة ديالك بطريقة متميزة وبالتالي تكون سيدة بيت متميزة واسرتك كدلك اسرة متميوة

امر مؤلم بزاف هو حال كثير من الأسر اللي كيعيشوبلا هدف محدد يمشيو عليه وبلا برمجة كتنظم حياتهم وتمشي بيهم نحو الأفضل ..
فالأسرة هي الخلية الاولى في المجتمع الإسلامي الى صلحات تصلح بإذن الله مجتمعنا
والىفسدت فسد مجتمعنا وعمت الفوضى فيه .

مانكلاوش انو المادة والكماليات والنجاح الخ الخ... هي اهتمامات اكتر الاسر!!!!

ولكن
أنا وأنتي وكل زوجة وأم بغينا أسرة متميزة ,
أسرة متميزة في كل شي ..
متميزة بتميز أفرادها دينياً وأخلاقياً وفكرياً واجتماعياً ودراسياً وعلمياً وصحياً



وففقرات اسرار الاسرة المغربية غادي
غادي نسعاو أنا وأنتي للوصول بأسرنا لأعلى مستوى من التميز
وإلى كانت عندك الرغبة فاسرة متميزة فباش تحققي هاد الهدف خليك معانا...

اشنو لازم تعملي :-

-لابد إاهتمي بهاد الفقرة وتسمعي لها مزيان واعتبريني كنتكلم معاك شخصيا ماشي كنتكلم بصفة عامة .

-خللي الله اول معين ليك وديما قدام عينيك يكون اول واحد تلتاجئي لو.

-ودبا خودي دفتر جديد خاوي

قسميه لثلاثة أقسام :
قسم خاص بيكِ أنت ِ , وقسم خاص بزوجك , وقسم خاص بأولادك

هذا الدفتر غادي تستخدميه كل ليلة ماغاديش ياخد منك وقت كتير, دقائق قليلة فقط
ووغادي نقول لك اشنو غادي تكتبي فيه

-الى بغيتي اسرة متميزة ماتكاسليش وكملي اللي غادي تبدايه معانا .

-وبالاستمرارية والصبر النتيجة غادي تكون كيف بغيتي فوياك والتسرع.

-قبل ماتبداي عملية الاصلاح الاسري لابد تصلحي راسك هو الاول لانو دارك هي مؤسسة كبيرة فيها أقسام كتيرة
وأفراد أعمارهم و شخصياتهم مختلفة وأنتِ هي المديرة فكيفاش المؤسسة تنجح الى ماكانتش مديرتها عارفة نفسها عارفة شنو باغا وشنو كتعمل.



الى تبعتي هادشي كامل البداية غادي تكون موفقة وافضل شي انك تكون باغا تبداي


جوانب الموضوع :-

التقويم الذاتي والاهمية ديالو وكيفاش يتعمل
علاقة برزوجك
نصائح عامة للتعامل مع أطفالك صغيرهم وكبيرهم
علاقة وليداتك ببعضياتهم ودورك فهاد العلاقة ؟


والله يرضي عليك ماتكونيش سلبية كل ماتعمليه هوتسمعي الفقرة وتحسري على وضعكِ ووضع أسرتك
ثم تنساي كلشي اللي تقال وكانو ماكيعني ليك والو
جربي
التجربة راها خير برهان

بداي معايا كتجربة والى لقيتي نتيجة وراحة نفسية واصلي معايا ..

مشوارنا فالحياة طويل واللي بغات حياة متميزة لابد تكون مستعدة نفسيا وجدسديا
وروحياً وفكرياً باش تخوض هاد التجربة

الأمرماشي صعب اطلاقا هو مسلٍ الى بغيتيه نتي يكون هاكاك

الى كنت انا أنا نجحت ف تطوير نفسي وأسرتي وارتقيت بها للأفضل فأنتِ أيضاً غادي تنجحي بادن الله

أانا ماشي ام متالية ولا زوجة متالية ولا اسرتي اسرة متالية ولا اتسم بالكمال...لكن هو فقط جهد كنقوم بيه وكنصغر عقلي ونكبر راسي و نخدم بجد باش نعيش هانية ونعيش اسرتي فمحيط هاني ونوصل للتميز
!!!!!!!!!!!!!!!!!
نتمنى سر المغربية فمنهجية التميز الاسري يكون وصلك وتابعي معانا حلقات البرنامج المقبلة لانها غادي تعاونك بالتفصيل على هاد التميز

فقرة اسرار صحية
تكلمنا لكم على ديدان الامعاء او او الحنيشات
oxuyorose

من خلال فقرة اسرار المغربية للنصائح المنزلية غادي ننقل لكم حوارنا فمنتدى ينبوع المحبة مع مدبرة من الطراز الاول مدبرتنا هارتكول

سولناها واش انت امراة مدبرة ام مبدرة


وجوابهااانها كانت مبدرة، و لكن دبا ماتتشري حاجة حتى نفكر، و ماتخدهاش دي ساعة تتضرب دورة و تقارن اثمنةعاد تاخد القرار


وبالنسبة للاقتصاد فالمصروف كتقول هارتكول انو



اقتصاد في المصروف بالنسبة لي هو نوصل بالعائلة لاخر الشهر بيخير و بلا كريدي و مبرعة
ماشي نزير راسي و لكن نعرف كيفاش نسلك راسي بالاحرى، كيفاش تنقتصد، كاين بعض الاسس البسيطة، اول حاجة ورقة و ستيلو في كوزينة حاجة تقادات تقيد و نشوف شحال يقدني شهر، لقيت بروموسيون نشري حاجة مضوبلة، انا تنفضل نشري من عند الهري، و لكن دبا و لا بعيد عليا يعني بعض المرات تنفكر حتى اقتصاد في الوقت و المركوب، يعني مثلا الى كنت غادي نمشي عند مول الهري و نضيع نصف ساعة او ساعة و 20 درهم مركوب من افضل نمشي مرجان و غادي يتقام عليا ارخص


وحاجة اخرى تمشي سوبرماشي و نتي شبعانة ماشي دايخة بالجوع

الى كان فيك جوع تتبقاي غير تشري في سقاطة و تتخلصي خبلة تلفوس في والو هده عن تجربة


هارتكول عطاتنا فالضايفة اللي عملات لنا مجموعة النصائح على مواد التنظيف

سمعو لها النصائح لانها فعلا قيمة

تتستعمل أوني تتاخد بواطة 250 غرام
تتاخد نصف بواطة تخلطها مع 5 لتر ماء، و قرعة خل صغيرة
جربات فيري معجون، حالتو و تيحرش ليدين
وبالنسبة لها هادي افضل طريقة لمسحوق الماعن اقتصادي ولطيف على اليدين




تتاخد اتشي 2 لتر او بعد المرات 5 لتر ديال جافيل عادي و كل لتر كنخلطو مع 2 لتر ديال ماء تنستعملو لي تجفاف او حكان حيوط




تتفضل هارتكول ميسو بربرو حيث تبقى مجهد الى تخلط مع الماء
قرعة تنخلطها مع 4 لتر د الما




صابون البلدي ماتتفرطش فيه
تنستعملو حكان ديال لافابو،
تخلط مع جافيل و تحك بيه الارض
و تديرو كمام و عنق ديال قميجات يخرجو غزالين
ملاحضة : كاين جوج انواع كاين كحل و واحد بحال الاخضر لي لون غامق هو الاحسن
الى خلطتي الصابون الاخضر مع جافيل تيولي خضر و ماتيدوبش اما الاخر تيولي برتقالي


الخل ابيض، تنستعملوه لماكينة صابون
الى كانت ريحة خايبة من بلاعة
تنخلط تاني مع الماء و يتمسح بيه الزجاج

بالنسبة لمسيح لعود، تنخلطو خل و زيت و تنمسحو بيهم العود
ماكينة صابون تنشري باكية ديال سكايب 3 كيلو تتبقى شي 3 اشهر





بالنسبة مواد الغدائية، تنتقداي حاجة ديال شهر، عندها مكان في بلاكار، الخضر كل أسبوع باعتبار عند هارتكول لائحة ديال الخضر اللي راجلها ماتيكلهمش، و حاجة لي تتخصر دغيا تتشري منها القياس
الفواكه، كل يومين او ثلاث

وعطات بعض النصائح منوعة اللي كاتخلاش عليهم متلا

• الى قديتتي شليظات مثلا زعلوك، تكتوكة وبغتي تحطيها في كونجلاتور كاين طريقة مزيان، تناخد الكمية ديال شخص و نديرها في ميكات صغورين و نكرصها بحال خبز حتى تتولي غير بحال ورقة و و نخليها في كونجلاتور، تنربح بلاصة بزاف

ونفس الشي تنديروه، كفت، سردين وكيكون بلاصة كتيرة
ممكن تعملي جيل دوش بلاصة صابون السائل لليدين
قرعة تعمل لك 2 قريعات د صابون سائل والتمن 10 درهم للجيل اي 5 دراهم للقرعة

• 
  وهكدا تربحي الفلوس والريحة رائعة
  

• 
  
  

• اقتصاد في استعمال الزيت، مثلا الى بغيتي ديري زيت في مقلة ديما تتكون زيت خويط و في بلاصة معينة من مقلة، بما ان هدا النقطة تتبقى معصباك،الحل، شري بخاخ ديال ماء، و ديري فيه زيت مخلط لعود و رومي، و في اي وقت تتديري زيت في مقلة ترش زيت و زيت تيكون في مقلة كلها

وبالنسبة للبخاخ تنتسعملوه في اشياء اخرى

بخاخ لجافيل، و لسانيكروا، الى بغيتي تمسح طبلة، حيط، اي بلاصة عمل بخاخ
و بخاخ اخر عملي فيه معطر الملابس ديال مكينة و تيستعمل كمعطر جو = وهادي فكرة نور الهدى=


و الى بغيتي تشري البخاخ جربيه عند مول لحانوت حيث كايني 2 نواع واحد تيتلق ماء مفرق على شكل رشة واحد النوع تيبقى مجموع الماء فهمتي

اختاري هداك لي تريش مفرق


هادي كانت نصائح الضيفة هارتكول مدبرة الينبوع اللي نتمناو تستافدو منها وتطبقوها لانها فعلا متنوعة وقيمة

تبارك الله عليك مدام التازي دوما متألقة بحضورك ومواضيعك

بارك الله فيك سيدي على تشجيعك

salam madam taziii stp stp bghit wassfa Klawi daba

tbarklah 3like dima f jadide

salam bghite téléchargé ha 7al9a kifach ndir

واخا حبيبة مريم

بارك الله فيك فاطمة الزهرا

العلمي
كليكي هنا
http://www.mediafire.com/?abe95zvbn42ya9r
من بعد غادي يعكيك هاد الجملة كليكي عليها صافي ويتلشارجا فكمبيوترك

Click here to start download from MediaFire..

mercii J'atten

merci madam tazi pr tous vos efforts lah ijazik sara7a bghir inchlh

بارك الله فيك

fikra momayzzaa w ra2i3aaa maziid man ta2aloo9 mercii madame tazii ^^

بارك الله فيكم

merciiiii

bi sarahe had chi fi al moustawa al matloub tbarka allah alikome massira mouwafaka

بارك الله فيكم

tbarkelah 3lik Mma TAZI tbarkelah tbarkelah

تبارك الله عليك احبيبتي مدام تازي انا معجب بك بزاف نت وخالتي كنزة

Mme Tazi tbarkellah 3lik o ALLAH yé3tik al 3afia dima metan9a tbarkelah 3lik

MERCI Mme tazi kantmna anni nkoun bhalk kantmna tkoun chi haja kathtam bnafsiyte lmar2a kifach tkoun da2iman mtfa2la

السلام الحادكات بغيت وصفةدقيق درة بدون خميرة لابني عاجل.......

tbark allah alik

ma3andi mangoul tbarekallah 3lik w khelass

allah e3tik essaha hbiba 3la had louasafate ou ennasaih

merci Mme Tazi lahla ykhatik lah i3tik saha 3la had nasaih w tawdihat

mme tazi ana min charrkt fi lala moulati jénvois toujours des messages pour avoir une recette de gateau de farine de mais mais aucune réponse merci

allah ya3tik assaha madame Tazi had mawadi3 alli kay3jbouni dial tadbir chou2oun al bayt , ana 3andi m3a fan attabkh mé 9tissad al bayt machi bazaf fidina aktar allah yakhalik , w 9adia okhra lajat 3la khatrak madame Tazi wa hia décoration dial la maison , 3la hsab les salons w la peinture dial les façades, khosasan kif kat3arfi had les couleurs alli wallaw, parexemple ana 3andi salon maftouh alloun dialo dartou rouge stiko mais ba9a wahla kifach nfarchou, ana 9taraht 3la mon mari ndir chaise longue ou une canapé , fidini man fadlak lik jazil achokr

tbarka llah 3lik alallamoulati.bar3ina blmazid mina lwasafat.merci

تبارك الله عليك يا اختي غير هو المشكل انه الكتابة عير واضحة و مسيرة موفقة